فرانسىيە پارلامېنتىدا ئۇيغۇر ئىرقىي قىرغىنچىلىقىنى ئېتىراپ قىلغانلىقى توغرىسىدىكى مىننەتدارلىق باياناتى | Fransiye parlaméntida uyghur irqiy qirghinchiliqini étirap qilghanliqi toghrisidiki minnetdarliq bayanati

[Latinchisi astida]

ئەسسالامۇئەلەيكۇم فىرانسىيەدىكى بارلىق شەرقىي تۈركىستانلىق ۋەتەنداشلار

ھەممىمىزگە مەلۇم بولغىنىدەك، 20-يانۋار فىرانسىيە دۆلەت پارلامېنتى، ئاۋام پالاتاسىدا 1گە قارشى 169 مۇتلەق ئۈستۈنلۈك ئاۋاز بىلەن شەرقىي تۈركىستاندا يۈز بېرىۋاتقان ئىرقىي قىرغىنچىلىقنى رەسمىي ھالدا ئېتىراپ قىلدى.

مەزكۇر قانۇن لايىھىنىڭ پارلامېنتتا ماقۇللىنىشى مۇھاجىرەتتىكى جۈملىدىن فىرانسىيەدىكى بارلىق ۋەتەنداشلىرىمىزنى ھاياجانغا سالدى. تۈنۈگۈن نەق مەيداندا نامايىشقا قاتناشقان، پارلامېنت ئىچىگە كىرىپ بۇ تارىخى ۋەقەگە شاھىت بولغان ھەممىمىزنىڭ كۆزلىرىگە ياشلار كەلدى. خۇشال بولدۇق، ھاياجانلاندۇق، ئۆز -ئارا تەبرىكلەر ئەۋەتىشتۇق. پۈتۈن دۇنيا مېدىئالىرىنىڭ دىققىتىنى تارتتۇق. فىرانسىيەدىكى شەرقىي تۈركىستان دەۋاسىنىڭ يەنە بىر بالداق يۇقىرى كۆتۈرۈلۈشىگە شاھىت بولدۇق...

بىز «فىرانسىيە ئۇيغۇر بىرلىكى» نامىدىن بۇ ئىشنىڭ ۋۇجۇدقا چىقىشى جەريانىدا يىللاردىن بېرى كۈچەپ كېلىۋاتقان «ياۋروپا ئۇيغۇر ئىنستىتۇتى»غا ۋە شۇنداقلا رەئىسى دىلنۇر رەيھان خانىمغا، ئىنستىتۇت ئىچىدىكى بارلىق قېرىنداشلىرىمىزغا ۋە يەرلىك فىرانسۇز ياشلارغا، لاگېر شاھىتلىرىدىن گۈلباھار جەلىلوۋا، گۈلباھار خاتىۋاجى، قەلبىنۇر سىدىق، ئۆمەر بېكئالى، تۇرسۇنئاي زىياۋۇدۇن، زۇمرەت داۋۇت، مېھرىگۈل تۇرسۇن قاتارلىق قەھرىمانلىرىمىزغا، يىللاردىن بېرى فىرانسىيەدىكى ئىمكانىيىتىنىڭ يېتىشىچە تېلېۋىزىيە، گېزىت، ژۇرناللاردا شۇنداقلا ھەرخىل چوڭ كىچىك پائالىيەتلەردە توختىماستىن گۇۋاھلىقلارنى بېرىپ ئاكتىپ ھەرىكەت قىلىپ كېلىۋاتقان سۆيۈملۈك ۋەتەنداشلىرىمىزغا، نامايىشلاردىن قالماي كېلىپ ۋەتەندىكى مەزلۇم خەلقىمىزنىڭ ئاۋازى بولۇۋاتقان شۇ ئوت يۈرەك ۋەتەنداشلىرىمىزغا، فىرانسىيەدە ئۇيغۇر مەسىلىسىنى كۈنتەرتىپكە ئېلىپ كېلىشتە ئەڭ زور كۈچ چىقارغان رافائەل گلۇكىسمەن ئەپەندىگە، مەزكۇر قانۇن لايىھىنىڭ پارلامېنتقا سۇنۇلىشىدىكى ئاساسلىق كۈچ چىقارغان فىرانسىيە سوتسىياللار پارتىيەسى ۋە ئۇنىڭ رەئىسى ئولىۋىيېر فوئۇغ ئەپەندىگە، شۇنداقلا فىرانسىيە ھۆكۈمىتىگە، فىرانسىيە پارلامېنتىدىكى بىز ئۈچۈن بېلەت تاشلىغان بارلىق دېپۈتاتلارغا چىن قەلبىمىزدىن تەشەككۈرلىرىمىزنى ۋە ئەڭ سەمىمىي ھۆرمىتىمىزنى بىلدۈرىمىز!!! سىلەرگە كۆپ رەھمەت!

ھەممەيلەن ھاياجانغا تولغان شۇ مىنۇتلاردا شۇنى ئۇنتۇلۇپ قالماسلىقىمىز كېرەككى، ۋەتىنىمىز تېخى قارا خىتاينىڭ نىجىس تاپىنىدىن قۇتۇلغىنى يوق، ۋەتىنىمىزدىكى ئاچا-سىڭىل، ئاكا-ئۇكىلىرىمىز ھېلىھەم قاراڭغۇ زىندانلاردا ئىڭرىماقتا، ئاياغ ئاستى قىلىنماقتا...خەلقىمىزنىڭ بارلىق ئۈمىدى بىزگە ئوخشاش چەتئەللەردىكى قېرىنداشلىرىغا قاراشلىق بولۇپ قالدى. ئىرقىي قىرغىنچىلىقنى فىرانسىيە پارلامېنتىدا تونۇتۇش- بۇ پەقەت بىر باشلىنىش، توختاپ قالمايلى!ئىنشائاللاھ ئالدىمىزدا تېخى نۇرغۇن ئىشلار بىزنىڭ پىداكارلىق بىلەن كۈرەش قىلىشىمىزنى كۈتۈپ تۇرماقتا! ئىنشائاللاھ فىرانسىيە ھۆكۈمىتىنىڭمۇ ئەمەلىي تەدبىر قوللىنىشىنى قولغا كەلتۈرەيلى، خىتايدا ئېچىلماقچى بولغان پەسكەش ئولىمپىكنى بايقۇت قىلىشىنى قولغا كەلتۈرەيلى، ۋەتىنىمىز ھەققىدە ئامېرىكىغا ئوخشاش ئەمەلىي قانۇنلارنىڭ لايىھىلىنىشى قولغا كەلتۈرەيلى! كۈرەشلىرىمىز تاكى ۋەتىنىمىزنىڭ ھەقىقىي ئازادلىقىنى، مۇستەقىللىقىنى قولغا كەلتۈرمىگۈچە توختاپ قالمىغاي!

ئاخىرىدا فىرانسىيەدە ياشاۋاتقان بارلىق شەرقىي تۈركىستانلىق ۋەتەنداشلارغا يەنە بىر قېتىم تەبرىكلەر بولسۇن، سىلەرگە رەھمەت

ھۆرمەت بىلەن «فىرانسىيە ئۇيغۇر بىرلىكى» ھەيئەت گۇرۇپپىسى

2022-يىلى 21-يانۋار، جۈمە.

 

essalamu’eleykum firansiyediki barliq sherqiy türkistanliq wetendashlar

hemmimizge melum bolghinidek, 20-yanwar firansiye dölet parlaménti, awam palatasida 1ge qarshi 169 mutleq üstünlük awaz bilen sherqiy türkistanda yüz bériwatqan irqiy qirghinchiliqni resmiy halda étirap qildi.

mezkur qanun layihining parlaméntta maqullinishi muhajirettiki jümlidin firansiyediki barliq wetendashlirimizni hayajan’gha saldi. tünügün neq meydanda namayishqa qatnashqan, parlamént ichige kirip bu tarixi weqege shahit bolghan hemmimizning közlirige yashlar keldi. xushal bolduq, hayajanlanduq, öz -ara tebrikler ewetishtuq. pütün dunya médi’alirining diqqitini tarttuq. firansiyediki sherqiy türkistan dewasining yene bir baldaq yuqiri kötürülüshige shahit bolduq...

biz «firansiye uyghur birliki» namidin bu ishning wujudqa chiqishi jeryanida yillardin béri küchep kéliwatqan «yawropa uyghur instituti»gha we shundaqla re’isi dilnur reyhan xanimgha, institut ichidiki barliq qérindashlirimizgha we yerlik firansuz yashlargha, lagér shahitliridin gülbahar jelilowa, gülbahar xatiwaji, qelbinur sidiq, ömer bék’ali, tursun’ay ziyawudun, zumret dawut, méhrigül tursun qatarliq qehrimanlirimizgha, yillardin béri firansiyediki imkaniyitining yétishiche téléwiziye, gézit, zhurnallarda shundaqla herxil chong kichik pa’aliyetlerde toxtimastin guwahliqlarni bérip aktip heriket qilip kéliwatqan söyümlük wetendashlirimizgha, namayishlardin qalmay kélip wetendiki mezlum xelqimizning awazi boluwatqan shu ot yürek wetendashlirimizgha, firansiyede uyghur mesilisini küntertipke élip kélishte eng zor küch chiqarghan rafa’el glukismen ependige, mezkur qanun layihining parlaméntqa sunulishidiki asasliq küch chiqarghan firansiye sotsiyallar partiyesi we uning re’isi oliwiyér fo’ugh ependige, shundaqla firansiye hökümitige, firansiye parlaméntidiki biz üchün bélet tashlighan barliq dépütatlargha chin qelbimizdin teshekkürlirimizni we eng semimiy hörmitimizni bildürimiz!!! silerge köp rehmet!

hemmeylen hayajan’gha tolghan shu minutlarda shuni untulup qalmasliqimiz kérekki, wetinimiz téxi qara xitayning nijis tapinidin qutulghini yoq, wetinimizdiki acha-singil, aka-ukilirimiz hélihem qarangghu zindanlarda ingrimaqta, ayagh asti qilinmaqta...xelqimizning barliq ümidi bizge oxshash chet’ellerdiki qérindashlirigha qarashliq bolup qaldi. irqiy qirghinchiliqni firansiye parlaméntida tonutush- bu peqet bir bashlinish, toxtap qalmayli!insha’allah aldimizda téxi nurghun ishlar bizning pidakarliq bilen küresh qilishimizni kütüp turmaqta! insha’allah firansiye hökümitiningmu emeliy tedbir qollinishini qolgha keltüreyli, xitayda échilmaqchi bolghan peskesh olimpikni bayqut qilishini qolgha keltüreyli, wetinimiz heqqide amérikigha oxshash emeliy qanunlarning layihilinishi qolgha keltüreyli! küreshlirimiz taki wetinimizning heqiqiy azadliqini, musteqilliqini qolgha keltürmigüche toxtap qalmighay!

axirida firansiyede yashawatqan barliq sherqiy türkistanliq wetendashlargha yene bir qétim tebrikler bolsun, silerge rehmet

hörmet bilen «firansiye uyghur birliki» hey’et guruppisi

2022-yili 21-yanwar, jüme.